Почнува аплицирањето за добивање на средства од „Програмата за рибарство и аквакултура“

Од денеска до 9 - ти јули 2018- та година, сите кои сакаат да градат нови или да ги ревитализираат старите рибници и пунктови ќе може да аплицираат за добивање на средства преку „Програмата за рибарство и аквакултура“ .

Преку оваа мерка ќе може да се градат нови риболовни пунктови, да ги реконнструираат и адаптираат постоечките, како и да направат рехабилитација на риболовни води со доградба, надградба и опремување на постоечките капацитети/мрестилишта за производство на репродуктивен и порибителен материјал. – вели диреторот на АФПЗРР Николче Бабовски.

Врз основа на член 7, алинеја 9 од Законот за основање на Агенцијата за финансиска поддршка во земјоделството и руралниот развој („Службен весник“ на Република Македонија број 72/07, 5/09, 43/14, 193/15 и 39/16), Агенцијата за финансиска поддршка во земјоделството и руралниот развој го објавува следниот ЈАВЕН ПОВИК бр. 01/2018 за доставување на барања за користење на средства од Програмата за финансиска поддршка во Рибарството и Аквакултурата за 2018 година .

Привршува рокот за пријавување за добивање на финансиска поддршка во земјоделството за 2018- та година

За неколку дена истекува рокот за пријавување на земјоделците за добивање на финансиска поддршка во земјоделство од програмата за 2018- та година. До денеска поднесени се вкупно 64,448 барања. Лани по Програмата за финансиска поддршка во земјоделството вкупно беа поднесени 70, 244 барања. Ги потсетуваме сите земјоделци кои не се пријавиле за добивање на државната помош, да не го чекаат последниот ден за пријавување, затоа што запазувањето на рокот за аплицирање е важно за навремено да се обработат барањата и навреме да се исплатат субвенциите. Барањата може да се поднесат по електронски пат, самостојно од страна на барателите. Доколку барателите имаат потреба за помош при поднесување на електронското барање, може да се обратат во подрачните единици на Министерството за земјоделство, шумарство и водостопанство.
Во овој период се поднесуваат барања за директни плаќања за растително производство и тоа за површини со полјоделски и градинарски култури, лозови и овошни насади и за сточарско производство и тоа за одгледување на говеда, овци, кози, пчели, свињи, живина и за заклани животни во кланици.
Барањата за мерките од растителното производство се поднесуваат врз основа на евидентирани податоци за парцели во Единствениот регистар на земјоделски стопанства и Системот за идентификација на земјишни парцели.
Барањата за мерките од сточарското производство за говеда, овци, кози и пчели, се поднесуваат врз основа на евидентирани податоци за животни во Регистарот за идентификација и регистрација на домашни животни со состојба на денот на поднесување на барањето. Затоа, ги потсетуваме одгледувачите, пред поднесување на барањето, задолжително да ја проверат и по потреба да ја ажурираат состојбата на животните во ветеринарното друштво со кое имаат склучено договор.

По повод „Светскиот ден на млекото“ директорот на Агенцијата за финансиска поддршка на земјоделството и руралниот развој Николче Бабовски, се обрати пред наградените фармери рекордери на „Битолската млекарница“. Бабовски ги информираше фармерите дека денеска Платежната агенција го објави повикот за поднесување на барања за исплата на 50 отсто од трошоците за мерката од Програмата за рурален развој за набавка на педигриран добиток од увоз или со потекло од признати организации, за ониe фармери кои го набавиле добитокот до 31.12.2017 година. Бабовски вели дека придонесот на фармерите и на „Битолската млекарница“ се значајни за домашното млекопроизводство како и за продуктите од млеко.

Од денеска на располагање се нови средства за поврат на инвестиција за нови овошни и лозови насади како и за набавка на педигрирани високостелни јуници

Од денеска, се до крајот на овој месец, сите земјоделци кои од 1- ви октомври се до 31 – ви декември 2017- та година ги зголемиле стадата, или пак формирале нови, ќе имаат можност да аплицираат за добивање на средствата од „Програмата за рурален развој“, односно Мерката 121 „Инвестиции за модернизација на земјоделски стопанства“.

Со овие средства, фармерите може да повратат од 50 до 75 отсто од вкупната инвестиција за оригинални или мелезни високостелни педигрирани јуници( со исклучок на јуници од расата „Буша“). Исто така преку оваа мерка се признаваат трошоците за набавка на педигрирани машки и женски приплодни грла овци, кози, оригинали или мелези на свињи( нерези и назимки), оригинали или хибриди од увоз или со потекло од признаени организации согласно Законот за сточарство. Освен поволности за набавка на расни грла добиток, од денеска може да се аплицира и за „Мерката за подигање на нови повеќегодишни лозови и овошни насади, повеќегодишни насади на ароматични растенија и медоносна флора(фацелија, еводија, и багрем) на нови површини.“

Врз основа на член 7, алинеја 9 од Законот за основање на Агенција за финансиска поддршка во земјоделството и руралниот развој („Службен весник“ на Република Македонија број 72/07, 5/09 43/14, 193/15 и 39/16), Агенцијата за финансиска поддршка во земјоделството и руалниот развој го објавува следниот ЈАВЕН ПОВИК бр.01/2018 за доставување на барања за исплата на средства од Програмата за финансиска поддршка на руралниот развој за 2018 година .

Преку поедноставување на процедурите за ИПАРД II програмата, до поголема искористеност на европските средства. Директорот на Агенцијата, Николче Бабовски во интервју за емисијата „Економски магазин“ рече: „Сите нотирани недостатоци, и пречки веќе се надминуваат. Вработените и во Агенцијата, но и останатите надлежни институции заеднички работат за да се надминат проблемите , а со тоа и да се искористат што е можно поголем дел од средствата кои земјава ги има на располагање за наредниот период. Само на првиот повик пристигнати се 1648 барања за сите три мерки.